euskadiko langile komisioak | 6 diciembre 2025.

Hezkuntza Laguntzako Espezialistak falta dira ikastetxe publikoetan

  • Ikasturteak arazo larri batekin hasi du bidea hainbat ikastetxe publikotan: Hezkuntza Laguntzako Espezialisten (HLE) gabezia. Egoera honek bereziki premia bereziak dituzten ikasleei eragiten die —ikasle zaurgarrienei— eta tentsioak sortzen ditu ikastetxe eta institutuen antolaketan.

11/11/2025.

Hilabeteak dira ordezkapenak eta esleipenak berandu edo etengabeko akatsekin iristen direla. Hezkuntza Sailak arazo informatikoak aipatzen ditu arrazoitzat, baina ezin da halako funtsezko lanpostuetan langile faltaren jarraipena soilik akats teknikoekin justifikatu. Praktikan, ikasle askok ez dute behar duten banakako arreta jasotzen, eta horrek haien hezkuntza inklusibo eta kalitatezko eskubidea urratzen du.

Horri gehitu behar zaio ordezkapen-zerrenden kudeaketa eraginkabea, behar bezalako abiaduran eguneratzen ez dena. Zenbait ikastetxetan, irakasle taldeek laguntza lanak bere gain hartu behar izaten dituzte, lan karga handituz eta hezkuntzaren kalitatea kaltetuz. Gainera, atzotik aurrera Pedagogia Terapeutikoko profesionalak bidaltzen ari dira Hezkuntza Laguntzako Espezialisten ordezkapenak egitera, eta neurri hori ez dator bat hezkuntza-arloko langileen ordezkapenak arautzen dituen indarreko araudiarekin, ezta sindikatuaren onespenarekin ere. Praktika honek araudia urratzen du eta HLEen eginkizun espezifikoen balioa gutxitzen du.

Egoera honen aurrean, CCOOirakaskuntzak Hezkuntza Sailari neurri zehatzak eskatzen dizkio zerbitzuaren jarraipena eta langileen egonkortasuna bermatzeko: urteko lanaldi-hirugarrenen metaketa baimentzea, kontratu osoagoak eskaintzeko; ordezkapen-zerrendak garbitu eta eguneratzea; zerrenda bereziak irekitzea, hizkuntza-profilen irizpide malguagoekin; eta esleipen-prozeduren gardentasuna eta zabalkundea hobetzea.

Era berean, sindikatuak eskatzen du ordezkapen-zerrendak berrikustea eta garbitzea, zigor bidegabeak ezabatuz eta langileen benetako eskuragarritasuna islatzen dutela bermatuz. Halaber, zerrenda berezi berriak irekitzea proposatzen du, irizpide malguagoekin hautagai berriak sartzeko; tartean, PL1 hizkuntza-profila dutenak behin-behinean onartuz, beharrezko maila lortu arte. Neurri hauek eraginkorrak izan daitezen, ezinbestekoa da deialdiak hobeto zabaltzea eta zigor eta esperientzia aitortzeko sistemak berrikustea. Berehala OPE berezi bat deitzea ere beharrezkoa da, hezkuntza bereziko langileentzat, errelebo-kontratuak estaltzeko eta lan-egonkortasuna handitzeko.

CCOOirakaskuntzak administrazioaren elkarrizketarako jarrera baloratzen du, baina ohartarazi du egungo neurriak ez direla nahikoak. Hezkuntza publiko inklusibo, bidezko eta kalitatezko bat bermatzeko, hezkuntza-laguntzako langileen kudeaketa-plan integral bat abian jartzea premiazkoa da, plantillen egonkortasuna eta ikastetxeen benetako beharrei erantzun azkarra bermatuko dituena.

    •